Náttúrugripasafn opnar á nýjum stað

06. júní 2007

Náttúrugripasafnið í Neskaupstað var opnað á nýjum stað á efstu hæð í Safnahúsinu í Neskaupstað á sjómannadaginn. Safnið var áður var til húsa í Sigmundarhúsi á Miðstræti 1.  Safnið er mjög glæsilegt en þar ber þó sérstaklega að nefna náttúrulega uppstillingu af dýrum í landslagi sem nær eftir endilöngu húsinu. Uppstillingin gefur safninu mikið líf en slíkt er vandasamt verk.

Lesa meira

Fugladagurinn 2007

10. maí 2007

Hinn árlegi fugladagur Ferðafélags Fjarðamanna og Náttúrustofu Austurlands sem haldin var þann 5. maí síðastliðin á leirunum í Norðfirði og Reyðarfirði tókst með ágætum. Dagurinn hófst kl. 09:00 á leirunum í Norðfirði undir leiðsögn Skarphéðins G. Þórissonar og Ránar Þórarinsdóttur og þrátt fyrir nokkurn kulda mættu um 12 áhugasamra fuglaskoðara við leiruna. Á leirunum við Reyðarfjörð hófst dagurinn kl. 10:30 undir öruggri leiðsögn Halldórs W. Stefánssonar en heldur fleiri eða 22 fuglaskoðarar voru mættir þar, enda Halldór ástsæll meðal fuglaskoðara á Reyðarfirði.  

Lesa meira

Mjaldur í Njarðvík

09. maí 2007

Mjaldur hefur haldið sig við fjörurnar í Njarðvík við Borgarfjörð eystra undanfarna daga. Hvalurinn sást fyrst við sandinn í Njarðvík á laugardaginn 28. apríl og hefur sést þar af og til síðan.

Lesa meira

Sumartalning 2002

25. apríl 2007

Hreindýr á Snæfellsöræfum voru talin á vegum Náttúrustofu Austurlands 5. júlí 2002 og á Lónsöræfum, Lónsheiði,
Stafafellsfjöllum og í fjallgarðinum á milli Lóns og Nesja 28. júlí 2002.  Nú fundust 2297 hreindýr á Snæfellsöræfum sem
er 401 dýri fleira en í talningunni 2000.  Niðurstaðan bendir til þess að talningin hafi heppnast mjög vel
að þessu sinni. Ljóst er að hreindýrastofninn er aðeins stærri en reiknað var með. Hagstætt
tíðarfar undanfarin ár og þ.a.l. lægri dánartíðni en gert er ráð fyrir skýrir það að hluta.

Talið var þann 28. júlí á Lónsöræfum, Lónsheiði, Stafafellsfjöllum og í fjallgarðinum á milli Lóns og Nesja.
Þar fundust 280 dýr til viðbótar.

Hreindýratalning á Snæfellsöræfum 5. júlí 2002

Hreindýratalning  á Lónsöræfum, Lónsheiði, Stafafellsfjöllum og í
fjallgarðinum á milli Lóns og Nesja 28. júlí 2002.

Myndir

25. apríl 2007

Rannsóknir

25. apríl 2007

Hreindýr- rannsóknir

Vöktun og rannsóknir á íslenska hreindýrastofninum
Samkvæmt breytingum á lögum um vernd, friðun og veiðar á villtum fuglum og villtum spendýrum, sem gerðar voru í maí 2000, annast Náttúrustofa Austurlands nú vöktun og rannsóknir á hreindýrastofninum. Rannsóknir á hreindýrastofninum fela annars vegar í sér hagnýtar rannsóknir  m.a. vegna vöktunar hreindýrastofnsins og vegna mats á ágangi hreindýra á land og hins vegar almennar rannsóknir til að auka þekkingu á líffræði og lifnaðarháttum hreindýra.

Hreindýratalningar Náttúrustofu Austurlands sumars og veturs
Hreindýr er talin á hverju ári til þess að meta stofnstærð. Verkefnisstjóri hreindýrarannsókna á vegum Náttúrustofu Austurlands er Skarphéðinn G. Þórisson. Hér er fjallað um hreindýratalningar á Vísindavefnum.
Tölur úr hreindýratalningum.

Rannsóknir á áhrifum fyrirhugaðrar Kárahnjúkavirkjunar á íslenska hreindýrastofninn
Rannsóknir á áhrifum fyrirhugaðrar Kárahnjúkavirkjunar á íslenska hreindýrastofninn fólust meðal annars í því að fylgst var með fari og farleiðum hreindýra norðan Vatnajökuls úr lofti.  Í þeim tilgangi var flogið yfir svæðið, dýrin staðsett, ljósmyndir teknar af hreindýrahópunum og fjöldi hreindýra á hverju svæði fundinn með aðstoð ljósmyndanna. Unnin var skýrsla sem byggði á þessum rannsóknum og fyrirliggjandi gögnum.  Einnig hefur verið lagt til að farið verði í frekari rannsóknir til að fylgjast betur með fari dýranna og þýðingu lónstæða fyrir þau.  Þar hefur verið stungið upp á að sett verði GPS staðsetningartæki í hálsól á nokkur dýr sem mundi staðsetja þau 12 sinnum á dag í 2 ár. 

Rannsóknir á áhrifum hreindýrabeitar á gróðurfar í Sandvík
Sandvík hentar afskaplega vel til  rannsókna á áhrifum hreindýrabeitar á gróðurfar þar sem engin önnur beitardýr ganga þar, auk þess sem svæðið er vel afmarkað landfræðilega og þar lifir staðbundinn hreindýrastofn.  Verkefnið er kostað af hreindýraarði sem sveitarfélagið Fjarðabyggð hefur fengið úthlutað.   Göngugarpar sem lagt hafa leið sína um Gerpisskarð s.l sumur hafa eflaust tekið eftir hælum og girðingum, ekki langt frá stikaðri gönguleið Ferðafélags fjarðamanna undir Hádegistindi í Sandvík, en þar er búið að koma upp rannsóknarreitum.  Rannsóknarreitirnir eru annars vegar afgirtir með hárri rafmagnsgirðingu til að hindra að hreindýrin komist í gróðurinn.  Hins vegar er um að ræða samanburðarreiti sem ekki eru afgirtir. Um sumarið 2002 var þyrla fengin til að aðstoða við fluttning girðingarefnis yfir í Sandvík en girðingar voru þá orðnar nokkuð illa farnar eftir hreindýr og vetur konung.