fb40x40 unionjack

logona314

logona314
  • Fréttir

Dagur hinna villtu blóma

2017 Blomadagurinn austurland Sunnudaginn 18.júní næstkomandi.

Hólmanes
Mæting við upplýsingaskiltið á bílastæðinu kl. 12:00. Gengið um friðlandið sem hefur að geyma ýmsar einkennisjurtir Austfjarða auk allmargra sjaldséðra tegunda.

Egilsstaðir
Gengið frá bílastæði við Miðhúsaá stutt ofan við Áningastein eftir göngustíg að Fardagafossi. Lagt af stað kl. 09:30 og komið til baka um kl. 12:00.

Leiðsögn: Starfsmenn Náttúrustofu Austurlands.
    
Frítt fyrir alla, góð samverustund fyrir alla fjölskylduna.
Nánari upplýsingar fyrir allt landið á vefnum
http://floraislands.is/Annad/blomdag.html

Litaafbrigði heiðagæsa

Heiðagæs með appelsínugula fætur og gogg, orange footed and nosed gooseÍ rannsóknum Náttúrustofu Austurlands á heiðagæsum í Austurlandshálendinu undanfarinn áratug hafa menn í auknum mæli séð gæsir með óhefðbundin útlitseinkenni sem lítið hefur orðið vart við annars staðar á landinu. Í stað hins hefðbundna bleika litar á fótum og í goggi heiðagæsa hafa sést einstaklingar með appelsínugula fætur og gogg, en einnig gæsir með blandað útlit, þ.e. annan fótinn bleikann en hinn appelsínugulann. Þetta fyrirbæri er líklega svo kölluð landnemaáhrif (e:founder effect) þ.e. þegar fáir einstaklingar með gena"galla" nema land á nýjum slóðum og afkomendur þeirra halda honum. Heiðagæs með einn appelsínugulan fót og hinn bleikan.

Þetta útlit gæsanna svipar til akurgæsa (Anser fabalis) sem verpa í norður Skandinavíu og túndrum Rússlands og Síberíu og flækjast stundum til Íslands. Akurgæsir eru stærri en heiðagæsir og hafa sterkari appelsínugula liti á fótum og í gogg. Athyglisvert er hvað þessi útlitseinkenni heiðagæsa eru algeng austanlands miðað við aðra landshluta þar sem þetta sést varla  í annars ört vaxandi stofni um land allt. Það vekur upp spurningu um mögulegan skyldleika við aðra stofna.

 

Nánar má lesa umfjöllun um þessar appelsínugulu heiðagæsir í skýrslu Náttúrustofunnar, Heiðagæsir á Snæfellsöræfum 2012.

 

 

 

Fugladagurinn 6.maí 2017

HrossagaukurÁrleg fuglatalning og fuglaskoðun verður næstkomandi helgi, samvinnuferð Ferðafélags Fjarðamanna og Náttúrustofu Austurlands..

Laugardaginn 6. maí 2017 síðdegis, mæting kl 17 á Norðfirði við Leiruna og kl 18 á Reyðarfirði við Andapollinn.

Sérfræðingar leiðbeina og fræða og koma með „fuglaskóp“ en gott væri ef þátttakendur gætu mætt með sjónauka. Allir velkomnir.

 


Þann 10 maí næstkomandi er alþjóðlegi farfugladagurinn og er yfirskrift ársins 2017 "þeirra framtíð er okkar framtíð".
Á vef fuglaverndar má nálgast nánari upplýsingar um daginn.

Safnadagurinn í Safnahúsinu í Neskaupstað

Dagbjört Lilja var dregin úr potti réttra svara og Hrefna Ágústa, sérlegur fulltrúi Náttúrustofunnar, afhenti verðlaunin.Fimmtudaginn 18. maí sl. var Alþjóðlegi safnadagurinn haldinn hátíðlegur víða um landið. Safnahúsið í Neskaupstað var opið og stóð Náttúrustofa Austurlands fyrir opnun í safninu og var gestum og gangandi boðið að koma og skoða safnið. Að auki stóð Náttúrustofan fyrir spurningaleik fjölskyldunnar þar sem gestir voru hvattir til að svara nokkrum snjall-spurningum um fugla í náttúru Íslands. Leikurinn fór fram með þeim hætti að spurningar voru staðsettar víðsvegar um Náttúrugripasafnið og var hægt að finna svörin með því að skanna QR kóða á spurningaspjöldum.
Fjölmargir gestir komu í safnið og þátttakan í leiknum var mjög góð. Dagbjört Lilja var dregin úr pottinum og hlaut hún í verðlaun bókina Undur Mýtatns - um fugla, flugur, fiska og fólk.
Við þökkum öllum kærlega fyrir komuna og minnum á að safnið er opið mánudaga til laugardaga milli kl 13.00 og 21.00 og sunnudaga milli kl 13:00 og 17:00.

 

Guðrún Óskarsdóttir, starfsmaður Náttúrustofunnar, dró úr réttum svörum.

mynd 1: Guðrún Óskarsdóttir, starfsmaður Náttúrustofunnar, dró úr réttum svörum.

Fuglaskoðun Náttúrustofu Austurlands og Ferðafélags fjarðamanna

Fuglaskoðun á Reyðarfirði 2017Árleg fuglaskoðun Náttúrustofu Austurlands og Ferðafélags fjarðamanna fór fram sl.laugardag 6. maí á Reyðarfirði og Norðfirði. Fram til þessa hefur verið boðið upp á fuglaskoðun á fjöru að morgni og hafa fuglaáhugamenn því stundum þurft að vakna snemma. Í ár var ákveðið að færa fuglaskoðunina fram á seinni part dags.  Að þessu sinni var viðburðurinn helgaður hinum alþjóðlega farfugladegi  sem var þann 10. maí. Kjörorð dagsins er "þeirra framtíð er okkar framtíð". Nánar má lesa um daginn á fuglavernd.is og á World migratory bird day.
Við leirurnar í botni Norðfjarðar mættu 15 manns til fuglaskoðunar, auk þriggja starfsmanna frá Náttúrustofu Austurlands. Til viðbótar mættu tveir starfsmenn sjónvarpsstöðvarinnar  N4 og verður viðburðinum gerð skil þar innan skamms. Fuglaskoðararnir voru á öllum aldri og m.a. tveir ofan af Héraði og hefur það ekki gerst áður. Flestir þeirra nutu þess að skoða fuglana í fjarsjá NA sem stækkar 20-60 falt.
Veður var kalt en bjart. Austan strekkingur var framan af og hiti 4-5 gráður °C. Fuglaathugunin hófst kl. 17:00 og stóð í um einn og hálfan klukkutíma.


Í ár sáust aðeins 20 tegundir meðan á formlegri athugun stóð og voru þær þessar: Grágæs, rauðhöfði, æður, hávella, tjaldur, heiðlóa, sandlóa, lóuþræll, sendlingur, stelkur, hrossagaukur,  tildra,  rita,  hettumáfur, silfurmáfur, bjargdúfa, kría, þúfutittlingur, maríuerla og  hrafn. Þá bættust við jaðrakanar og nokkrar skúfendur á Ingunnarkíl og hrossagaukur á flugi þegar kíkt var lauslega yfir allt svæðið eftir að fuglaathuguninni lauk.

Skarphéðinn fræddi gesti um fuglana  sem sáust og um merkingar á grágæsum á Austurlandi.  Í fyrra fengu tvær Norðfirskar gæsir (Sjókarl og Sveinn) gervihnattasenda um hálsinn og ein gæs á Egilsstöðum (Skúli). Sjókarl þagnaði ytra en Sveinn var skotinn. Sendirinn af honum verður settur á grágæs í Norðfirði í sumar. Skúli skilaði sér til landsins í vor og dvelur nú á svipuðum slóðum og hann var merktur. Arnór Sigfússon stóð fyrir merkingunum með hjálp Náttúrustofunnar.  Fylgjast má með gæsunum á Satellite Tracking Map.
Við leirurnar í Reyðarfirði mættu 10 manns til fuglaskoðunar, auk Halldórs W. Stefánssonar frá Náttúrustofu Austurlands. Veður var ágætt,  hafgola, léttskýjað og hiti 10-12°C.   Fuglaskoðunin hófst kl. 18:00 og  sáust  31  fuglategund sem voru þessar: Skógarþröstur, stelkur, hettumáfur, jaðrakan, skúfönd, maríuerla, grágæs, urtönd, stokkönd, heiðlóa, tjaldur, kría, sandlóa, lundi, æður, spói, tildra, rauðhöfðaönd, hávella, álft, lóuþræll, svartbakur, straumönd, bjargdúfa, fýll (múkki), silfurmáfur, sendlingur, kjói, heiðagæs, hrafn og hrossagaukur.

 

Viltu beisla mátt fjöldans við náttúrurannsóknir og hanna hreindýravefsjá/app í sumar?

Auglysing Náttúrustofa Austurlands vill ráða nema í grunn - eða meistaranámi til að  vinna verkefni sem styrkt er af Nýsköpunarsjóði námsmanna til starfa í sumar.   Verkefnið  Námsmaður hannar og setur upp hreindýravefsjá sem verður hluti af vöktun hreindýra  á Austurlandi og hefur það markmið að safna upplýsingum frá almenningi (e: crowdsourcing)  um dreifingu hreindýra og samsetningu hjarða. Verkið innifelur m.a. að hanna  landupplýsingagagnagrunn og mögulegt einfalt app til að senda inn myndir og staðsetningar  af hreindýrum. Hreindýravefsjáin verður aðgengileg öllum.    Nemandinn verður ráðinn frá 1. júní til 31. ágúst 2017 eða eftir samkomulagi og  laun eru samkvæmt kjarasamningi fjármálaráðherra og hlutaðeigandi stéttarfélags.   Hæfnin Við leitum af nema í grunn- eða meistaranámi t.d. í tölvunarfræði eða landfræði með áherslu  á landupplýsingatækni. Æskilegt er að viðkomandi sé sjálfstæður í vinnubrögðum, hafi  frumkvæði og metnað til að sýna árangur og eigi auðvelt með að vinna með öðrum.   Vinnustaðurinn  Náttúrustofa Austurlands vaktar hreindýrastofninn á Austurlandi og sinnir fjölbreyttum  verkefnum í tengslum við rannsóknir, ráðgjöf og þekkingarmiðlun á náttúrufari.  Skrifstofur eru í Neskaupstað og á Egilsstöðum.  Umsóknarfrestur er til og með 10. maí n.k. Kristín Ágústsdóttir forstöðumaður tekur við  umsóknum og fyrirspurnum í netfangið This email address is being protected from spambots. You need JavaScript enabled to view it. eða í síma 8460922.

Náttúrustofa Austurlands

  • Kt: 461094-2529
  • Sími: 477-1774
  • Netfang: na(hjá)na.is

Starfsstöð í Neskaupstað

Mýrargötu 10
740 Neskaupstaður

Starfsstöð á Egilsstöðum

Tjarnarbraut 39b
700 Egilsstaðir