Mjaldur í Njarðvík
Mjaldur hefur haldið sig við fjörurnar í Njarðvík við Borgarfjörð eystra undanfarna daga. Hvalurinn sást fyrst við sandinn í Njarðvík á laugardaginn 28. apríl og hefur sést þar af og til síðan.
Mjaldurinn er skjannahvítur og Andrés Hjaltason, bóndi í Njarðvík, segir hvalinn synda í rólegheitum fram og til bara meðfram sandinum. Hann segir nokkra umferð fólks í fjörunni til að virða hvalinn fyrir sér. Mjaldur er smáhvalur sem verður mest um 5 metra langur, en fullvaxin dýr eru ljósgul eða alhvít. Mjaldurinn er flækingur við Ísland en heimkynni hans eru við ísröndina á norðurskautinu. Hann er gæfur að eðlisfari og fremur auðvelt að komast að honum. Gísli Víkingsson, hvalasérfræðingur hjá Hafrannsóknarstofnun, segir afar sjaldgæft að mjaldur sjáist hér við land. Svo virðist sem mjaldurinn sé nú farinn úr Njarðvík en síðast sást hann föstudaginn 4. maí.
