Gleðileg jól

22. desember 2010

Starfsfólk Náttúrustofu Austurlands sendir sínar bestu
jóla og nýárskveðjur,
með þökk fyrir samskiptin á liðnu ári.

Hreindýr jólasveinanna?

21. desember 2010

Hreinkýrin Ána hefur tekið lykkju á sína hefðbundnu leið undafarna daga og leiða menn líkum að því að jólasveinarnir í Dyrfjöllum og mamma þeirra Grýla hafi tekið Ánu í sína þjónustu.

Ána í Möðrudalskvos, áður en hún tók á rás út í Dyrfjöll.

(Smelltu á myndina til að lesa meira)

Lesa meira

Hreindýrin heimsótt í skammdeginu

17. desember 2010

Þann 14. desember voru hreindýrin heimsótt á TF KLÓ undir öruggri
stjórn Halldórs Bergssonar eins og oft áður, Leifur Þorkelsson haustari
var til halds og trausts. Ána hafði verið á milli Skjöldólfsstaðahnjúks og
Sandfells daginn áður en við fundum hana ekki.
Hins vegar fundum við Hlíðarendu og Röngu í 226 dýra hjörð SV Súlenda
en hjörðin hafði þá dvalið í nokkrar vikur í Vopnafirði.
Í Fossárdal fundum við Öxu en þar og í fellinu voru margir hópar.
Á Öxi fundum við síðan Heiðu en þar og innst með Geitdalsánni voru
margir hópar. Á einni myndinni sést að kýr á Öxi er með
drasl um hornin en sem betur fer virðist það ekki skaða hana.

Í töflu sem fylgir hér eru sundurgreindir þeir hópar sem senditækjakusur voru í töfluna má nálgast hér.

250 hreindýr á Fagradal

01. desember 2010

Þann 29. nóvember var stór hreindýrahópur norðan við Launána á Fagradal.
Teknar voru 7 myndir af dýrunum og þeim síðan raðað saman í tölvu og dýrin talin. Þau voru 250
en þar sem aðeins um 200 dýr eru talin vera í Reyðarfjarðarhjörðinni er greinilegt að um 50 dýr eru
í heimsókn, gætu t.d. verið komin úr Mjóafirði. Vegfarendur þurfa því að fara með gát um Fagradalinn
en mesta hættan á að keyra á hreindýr er einmitt í skammdeginu.

Náttúrustofan fagnar öllum upplýsingum um hreindýr og hvetur fólk til að senda inn upplýsingar –
þeir sem eru með myndavél með sér geta jafnvel myndað hópinn þó svo að það þurfi fleiri en eina
mynd og senda síðan Náttúrustofu sem raðar þeim saman og telur af þeim. Gæta þarf að því að
myndirnar séu í mestu upplausn sem vélin bíður upp á svo og að sami aðdráttur sé á þeim öllum
og að þær skarist greinilega.
Mynd með fréttinni má nálgast hér.

Nýjustu staðsetningar hreindýranna

29. nóvember 2010

Nýjustu staðsetningar hreindýranna: Ánu, Ásu, Röngu og Hlíðarendu voru uppfærðar til 28. nóvember.
Jafnframt er búið að raða saman ferlum allra dýranna í hlekknum: "Allar kýrnar saman"
Best er að skoða síðurnar í öðrum vöfrum en Internet Explorer 8, eða amk. tryggja að í
skoðunarhamsstillingum IE8-vafrans sé stillt á Compatibility View Settings fyrir na.is. Sbr. hér:

Fræðsluerindi Náttúrustofanna hefjast á ný

23. nóvember 2010

Náttúrustofur eru sjö talsins og staðsettar í öllum landshlutum. Þar starfar hópur fagfólks á ýmsum fræðasviðum.
Náttúrustofurnar hafa myndað Samtök náttúrustofa (SNS) og standa nú fyrir fróðlegum fræðsluerindum í fjarfunda- búnaði víðs vegar um landið.

Fyrsta erindi þessa vetrar verður Fimmtudaginn 25. nóvember n.k. kl. 12:15-12:45.
Gunnar Þór Hallgrímsson, líffræðingur á Náttúrustofu Reykjaness,  flytur erindi sitt:
“Farhættir íslenskra sílamáfa”
Næsta fræðsluerindi kemur frá Náttúrustofu Vesturlands, fimmtudaginn 27. janúar 2011.