Jólakveðja

20. desember 2018

Uppstoppaður hreindýrstarfur á Náttúrugripasafninu í Neskaupstað

19. desember 2018

Vorið 2017 fékk Náttúrustofa Austurlands styrk úr Samfélagssjóði Alcoa til að stoppa upp hrein­dýrs­tarf til sýningar á Náttúrugripasafninu í Neskaupstað. Tarfurinn var veiddur með sérstöku leyfi umhverfis­ráðuneytisins, haustið 2017 á Bræðrahrygg á Hraunum og stoppaður upp af Reimari Ásgeirssyni á Egilsstöðum. Farið var víða í leitinni að rétta dýrinu en lagt var upp með að krúnan væri með allt sem prýðir íslensk hreindýrshorn, spaða, bakgreinar, langar krúnugreinar og góða samhverfu milli hornanna. Hann vó 96 kg og var sennilega 5 vetra. Það er mikill fengur að hafa svo glæsilegt eintak af einu helsta einkennistákni austfirskrar náttúru meðal safngripa.

Lesa meira

Uppstoppaður hani gjöf til Náttúrugripasafnsins

07. nóvember 2018

Náttúrugripasafninu í Neskaupstað áskotnaðist um liðna helgi glæsilegur uppstoppaður hani. Haninn var boðinn upp á árlegum markaði Hosanna sem haldinn var í Safnahúsinu. Það var Pólska samfélagið í Neskaustað sem bauð best í hanann og ákvað að færa hann Náttúrugripasafninu að gjöf. Þannig voru slegnar tvær flugur í einu höggi með styrk til bæði Hosanna og Náttúrugripasafnsins. Það voru Kristín Ágústsdóttir og Guðmundur Sveinsson sem tóku við hananum fyrir hönd safnsins. 

Haninn hefur frá upphafi fylgt húsinu Brekku í Neskaupstað, en það voru núverandi hænsnabændur á Brekku sem gáfu Hosunum hanann uppstoppaða. Áður var hann eigu hjónanna Guðna og Úrsúlu á Brekku, bæði lífs og liðinn.

Lesa meira

Ungir tarfar samfastir á hornum í rafmagnsvír

15. október 2018

Sigurður Guðjónsson á Borg á Mýrum lét Náttúrustofuna vita af tveimur ungum törfum samföstum á hornum í rafmagnsvír. Honum tókst að fanga þá með netbyssu Náttúrustofunnar og losa með hjálp góðra manna undir vökulu auga héraðsdýralæknisins Wija Ariyani. Hún tók meðfylgjandi myndir. Náttúrustofan hvetur alla sem ganga fram á girðingarleyfar í náttúru að gera viðeigandi ráðstafanir.

Grátrönur koma upp ungum

04. október 2018

Grátrönur (Grus grus) hafa lengið verið flækingsfuglar á Íslandi og áttu fæstir von á að þær tækju upp á því að verpa hérlendis í bráð. Engu að síður hafa þær orpið á Austurlandi í nokkur ár og hefur Náttúrustofan áður flutt fréttir af því.
Síðastliðið vor mættu þær austur á land en lítið fór fyrir þeim þrátt fyrir stærðina og er lítið vitað hvað þær aðhöfðust um sumarið annað en það að um haustið birtust þær með afraksturinn, tvo fleyga unga tilbúnar til farflugs.
Þessir tignarlegu fuglar eru kærkomin viðbót við það sem fyrir er og mögulega getur myndast hér lítill varpstofn sem áhugavert verður að fylgjast með í framtíðinni. Og þá er bara að bíða og vona að þær skili sér til baka að ári.

Meðfylgjandi myndir tók Halldór Walter Stefánsson af grátrönupari með tvo unga 18. september 2018.

Vetrarbeit hreindýra

19. september 2018

Í byrjun september fengu starfsmenn Náttúrustofunnar norskan gróðursérfræðing, Hans Tømmervik, í heimsókn til að koma af stað rannsókn á vetrarbeit hreindýra. Það gekk vel og urðu starfsmenn Stofunnar margs fróðari um fléttur og annan gróður sem hreindýrunum þykir gott að bíta.