Með öræfin í bakgarðinum
Ráðstefna um tengsl hálendis og samfélags á Austurlandi var haldin dagana 24.-25. maí á Hótel Héraði. Ráðstefnan var að frumkvæði Unnar Birnu Karlsdóttur hjá Stofnun rannsóknasetra Háskóla Íslands á Austurlandi í samvinnu við Söguslóðir Austurlands, Náttúrustofu Austurlands, Minjasafn Austurlands, Vatnajökulsþjóðgarð/Snæfellsstofu og Óbyggðasetur Íslands. Tveir starfsmenn Náttúrustofu Austurlands héldu erindi á ráðstefnunni, Skarphéðinn G. Þórisson fjallaði um hreindýr og gæsir á hásléttu Austurlands og Guðrún Óskarsdóttir um gróður á hásléttu Austurlands. Önnur erindi fjölluðu m.a. um jarðfræði, eldvirkni, byggðasögu og hreindýraveiðar á Austurlandi og voru allir á einu málu um að öll erindin hafi verið afar fræðandi og skemmtileg.
Fyrri daginn að fyrirlestrum loknum bauðst ráðstefnugestum að skoða sýninguna „Hreindýrin á Austurlandi“ og aðrar sýningar í Minjasafni Austurlands. Seinni daginn var boðið í söguferð um Fljótsdalshérað, undir leiðsögn Baldurs Pálssonar. Hádegismatur var snæddur í Klausturkaffi og síðan heimsótti hópurinn Snæfellsstofu og Óbyggðasafn Íslands og fékk þar leiðsögn þjóðgarðsvarðar og staðarhaldara. Að lokum var horft yfir söguslóðir og náttúru á Fljótsdalsheiði og Snæfellsöræfunum.
Náttúrustofa Austurlands þakkar Unni Birnu kærlega fyrir flott framtak, öllum sem að ráðstefnunni komu fyrir móttökuna og gestum hennar fyrir ánægjulega og lærdómsríka samveru.
Myndirnar sem fréttinni fylgja voru fengnar hjá Stofnun rannsóknarsetra Háskóla Íslands og hjá Ásdísi Helgu Bjarnadóttur sem er MSc nemi í ferðaþjónustu með áherslu á viðburðastjórnun en ráðstefnan var viðfangsefni í tengslum við fræðslutengda ferðaþjónustu er fellur að lokaverkefni hennar.
