Grænfánaafhending
Þann 23. júní kom Náttúrustofa Austurlands við í leikskólanum Brekkubæ á Vopnafirði með Grænfána handa krökkunum og starfsfólki leiksólans. Grænfáninn er viðurkenning sem veitt er skólum og leikskólum sem náð hafa góðum árangri í umhverfismálum. Grænfáninn er hluti verkefnis á vegum alþjólegs félags sem heitir Foundation for Environmental Education (FEE). Þetta félag stýrir umhverfismenntunarverkefni þar sem 38 þúsund skólar í 50 löndum taka þátt. Verkefnið gengur út á að auka umhverfismenntun í skólum og vitund nemenda og kennara í umhverfismálum. Landvernd er fulltrúi FEE hér á landi og sér um utanumhald verkefnisins. Náttúrustofa Austurlands hefur verið þeim innan handar með að koma fánanum í skóla og leikskóla á Austurlandi.
Krakkarnir í Brekkubæ eru að fá þennan fána í fyrsta sinn og vill Náttúrustofa Australands óska þeim til hamingju með þann frábæra árangur. Fáninn er mikil viðurkenning veitt til tveggja ára. Til að halda í fánann þurfa skólar því að sýna fram á áframhaldandi góðan árangur. Náttúrustofa Austurlands óskar Brekkubæ jafnframt velfarnaðar í þeirri baráttu. 