Jötunuxar á ferð og flugi
Nokkuð hefur borið á jötunuxum (Creophilus maxillosus) hér í Neskaupstað og hefur Náttúrustofunni borist alls 4 eintök nú í maí og haft fregnir af fleirum.
Jötunuxar eru stórar bjöllur af uxaætt (Staphylinidae) og finnast á láglendi um land allt. Helst er þó að finna þá í gripahúsum og safnhaugum en einnig finnast þeir í og við íbúðarhús. Hann er auðþekktur á stærð sinni og gráu þverbelti sem liggur yfir skjaldvængina. Hann er á ferli frá apríl og fram í september. Fullorðnu dýrin verpa í maí og lirfurnar eru fullvaxta í ágúst og púpa sig. Púpurnar klekjast skömmu síðar og bjöllurnar eru síðan á ferli uns þær leggjast í vetrardvala. Jötunuxar eru örgustu rándýr bæði lirfur og fullorðnu dýrin. þeir geta tekið upp á því að fljúga, helst þó á hlýjum sólbjörtum dögum.
Heimildir
Guðmundur Halldórsson, Oddur Sigurðsson og Erling Ólafsson 2002. Dulin veröld. Smádýr á Íslandi. Mál og mynd, bls 64.
www.ni.is
