Vettvangsferð á Fljótsdalsheiði
Dagana 17.-19. ágúst fóru tveir starfsmenn Náttúrustofunnar í vettvangsferð inn á Fljótsdalsheiði og Vesturöræfi til að kanna ástand gróðurreita. Gróðurreitirnir voru settir niður á árunum 2007 og 2008. Þeir eru hluti af langtíma vöktunarverkefni þar sem fylgst er með hugsanlegum breytingum á gróðurfari á áhrifasvæði Hálsóns.
Tilgangur ferðarinnar var að yfirfara, lagfæra og taka myndir af reitunum. Gróðurbreytingar geta m.a. orðið vegna áfoks, beitar eða breytts veðurfars. Slíkar breytingar gerast yfirleitt hægt og því þarf að fara reglulega í reitina og yfirfara þá svo þeir standist tímans tönn. Gróðurúttekt í reitunum er svo gerð með 5-10 ára millibili. Nú hafa gróðurreitirnir á Vesturöræfum verið yfirfarnir tvisvar og á Fljóstdalsheiði einu sinni. Ástand þeirra var misjafnt en yfirleitt gott. Veður í ferðinni var gott.
