Dularfullir gráir fuglar á Úthéraði
Í lok ágúst fóru að berast fréttir af því að gráir stórir fuglar sæjust frá vegi út á Eyju á Úthéraði. Fylgdi sögunni að hér væri ekki um gráhegra að ræða. Þrátt fyrir nokkra leit starfsmanna Náttúrustofunnar sáust engir stórir gráir fuglar þar. Það var svo 6. september sem Pétri Erni Hjaltasyni tókst að mynda þá við Gagnstöð og voru þar greinilega tvær grátrönur á ferðinni. Í síðustu skoðunarferðum Náttúrustofumanna leyndu sér ekki slóðir eftir trönurnar á svipuðum slóðum og Pétur hafði myndað þær.
Grátrönupar var sumarlangt á þessum slóðum 2012 og 2013 en engar sáust 2014. Nú dúkka þær upp seint og um síðir en miklar líkur eru á að þær hafi verið á þessum slóðum í sumar þó svo að starfsmönnum stofunnar hafi ekki tekist að finna þær.
Pétur Örn Hjaltason veitti stofunni góðfúslegt leyfi sitt til að birta myndirnar hans.