Síðasta náttúrufræðinámskeið sumarsins.
Vegna góðrar þátttöku og mikils áhuga á Náttúrufræðinámskeiði sem fór fram í júlí var ákveðið að halda annað námskeið. Það fór fram dagana 8. - 12. ágúst og var haldið á vegum Náttúrustofu Austurlands fyrir börn á aldrinum 8-10 ára, líkt og fyrra námskeið. Námskeiðið var styrkt af samfélagssjóði Samvinnufélags útgerðarmanna í Neskaupstað og Alcoa Fjarðarál. Námskeiðið var fullt og tóku 10 hressir krakkar þátt. Það var með eindæmum vel heppnað en krakkarnir skoðuðu með leiðbeinendum sínum ýmiskonar lífverur í mismunandi vistkerfum. Spurningum og fróðleik af ýmsu tagi var velt upp, til að mynda um tegundasamsetningu vistkerfa, búsvæða- og fæðuval lífvera og lífeðlisfræði þeirra. Plöntur voru skoðaðar, greindar og pressaðar, settar voru upp jarðvegsgildrur og smádýrin sem veiddust skoðuð. Einnig var gengið út í urðir í sól og blíðu og helstu fuglategundir skráðar. Þá var gengið upp að Hólatjörnum í góðu veðri þar sem vaðið var út í tjarnir og lífríki ferskvatns var kannað. Í lok hvers dags voru skráðir í feltbók helstu atburðir dagsins og tegundir sem fundust. Fimmtudeginum var varið inni inn í skólastofu Verkmenntaskóla Austurlands, m.a. vegna veðurs. Þar voru sýnin sem söfnuðust fyrripart viku skoðuð í víðsjá og tegundir greindar, ýmiss konar skemmtilegir fiskar, sem veiddir höfðu verið á Bjarti NK, skoðaðir og sumir krufðir. Sömuleiðis var hið stórskemmtilega Fuglabingó brúkað til hins ýtrasta. Seinasta degi námskeiðsins var eytt í fjörunni, þar sem lífríki fjörubúa var kannað, marflær veiddar og doppur skoðaðar. Í lok dags voru pressaðar plöntur settar í möppur á vísindalegan hátt og rifjað upp það helsta sem við höfðum séð í vikunni. Við námskeiðslok fengu allir viðurkenningarskjöl til votts um dugnað og áhugasemi á námskeiðinu.
Starfsmenn Náttúrustofunnar þakkar sérlegum aðstoðarmanni sínum Önnu Karen kærlega fyrir hjálpina og krökkunum fyrir ánægjulegar stundir. Við skemmtu okkur vel enda var hópurinn samansettur af hressum og skemmtilegum krökkum sem sýndu náttúrunni áhuga.
